Mvua kubwa iliyoambatana na radi iliyonyesha majira ya saa nane mchana leo tarehe 10/02/2016 imesababisha vifo vya wanafunzi watatu wa shule ya sekondari Kanazi na kujeruhi wengine 19 ambao mpaka sasa wanapatiwa huduma katika hospitali teule ya Murgwanza wilayani Ngara mkoani Kagera.
Mvua hiyo ilianza kunyesha wanafunzi wakiwa shule na kusababisha adha hiyo shuleni hapo, mtandao wa ngarayetu haukufanikiwa mara moja kupata majina ya wanafunzi hao na kidato chao kutokana na kila mtoa taarifa kupigwa na butwaa.
Mtandao wa ngarayetu unatoa pole kwa Idara ya Elimu Sekondari wilaya ya Ngara mkoani Kagera, Mkuu wa Shule na Walimu wa Shule ya Sekondari Kanazi, Wanafunzi na Wazazi wote kwa vifo vya Wanafunzi hao wa Shule ya Sekondari Kanazi, vilivyosababishwa na Radi hiyo.
Mungu awatie Moyo wafiwa na awajaalie nafuu ya mapema Majeruhi, Ameen